Dieđut Sámi Jienat kora birra

Sámi Jienat lea sámi prošeaktakora mii vuođđuduvvui 2002:s. Mis leat miellahtut Ruoŧas, Norggas ja Suomas. Mii lávlut sámegillii, ja mii juoigat. Sámegielain oaivvildit buot sámegielaid. Go min miellahtut orrot bieđgguid de eat sáhte nu dávjá deaivvadit hárjehallat. Mii hárjehallat vahkkoloahpaid. Gaskamearálaččat deaivvadit mii 2 geardde jahkebealis. Dát bargovuohki addá miellahtuide stuora ovddasvástádusa hárjehallat ruovttus. Mis ii leat geahččaleapmi sidjiide geat háliidit searvat, dan maid mii gáibidit lea ahte sii geat servet háliidit lávlut sámi koramusihka.

Koramusihka lea ođas Sámis. Easka maŋemus 15-20 jagi leat ásahuvvon sámi korat, muhto ain gávdnojit hui unnán sámi korat, eaige gávdno sámi korat eará go Norggas. Go koramusihka lea ođas Sámis, de gávdno unnán musihkka mii lea heivehuvvon koraide. Danne lea Sámi Jienat koras stuora ovddasvástádus oažžut eambbogiid ráhkadit sámi koramusihka. Sálbmaprošeavtta oktavuođas mii mis lei 2003-2005 leat mii ožžon 20 sálmma heivehuvvot korai. Mii leat vuovdnát go leat ožžon ovttasbarggu dovddus sámi musihkkariin Frode Fjellheimain. Son galgá erenoamážit min korai ráhkadit korabihtá mas luohti lea vuođđun.

Muđui mii dávjá lágidit konsearttaid hárjehallamiid oktavuođas. Mii leat maid almmuhan sálbma-CD; Sálmmat Sámis.